VOV.Êđê- Bi trông hlăm Êpul kơ hdră bhiăn bi lông čhĭ ngăn drăp (lŏ mlih mrâo) hlăm aguah mbruê, 19/10, Khua bruă kƀĭn ala Trần Thanh Mẫn mñă klă, klei phŭn mơ̆ng bruă bi leh hdră bhiăn anei brei djŏ, djŏ hdră êlan mơ̆ng Đảng.

VOV.Êđê- Ti čar Quảng Ngãi, lu đảng viên mnuih Ca Dong ba anăp hlăm hdră mđĭ kyar bruă duh mkra, mkŏ mjing êpul hgŭm bruă, duah anôk ba čhĭ mnơ̆ng dhơ̆ng lŏ hma leh anăn mtô kơ mnuih ƀuôn sang bi mlih hdră pla mjing. Mơ̆ng phŭn mkăp prăk leh anăn dŭm hdră bruă mơ̆ng Hdră kñăm ala čar mđĭ kyar bruă duh mkra - ala ƀuôn krĭng mnuih djuê ƀiă leh anăn krĭng čư̆ čhiăng mkŏ mjing leh dŭm êpul hgŭm bruă duh bi liê mkra mjing, mkŏ mjing bruă mă, mđĭ hnư hrui wĭt leh anăn ƀrư̆ ƀrư̆ mkŏ mjing krĭng pla mjing ti anôk.

VOV.Êđê- Giăm sa thŭn leh gưl angĭn êbŭ mrô 13 leh anăn klei êa lip lêč prŏng prĭn hlăk mlan 11 thŭn dih, krĭng phŭn rông hdang prŏng ti kplang ksĭ Xuân Đài, ƀuôn hgŭm Sông Cầu, čar Dak Lak hlăk mŭt hlăm wưng ba čhĭ. Dŭm huôm hdang bŏ, truh hnơ̆ng prŏng ba klei mơak kơ mnuih rông. Klei gĭr ktưn hgao klei dleh dlan mơ̆ng mnuih ƀuôn sang mbĭt hŏng hdră brei čan prăk đru kơrŭ wĭt bruă mkra mjing dôk ba wĭt ai êwa kơ bruă yuôm bhăn ti nah ngŏ Dak Lak.

VOV.Êđê- Hnơ̆ng đĭ kyar 9 mlan thŭn 2026 mơ̆ng Khánh Hòa đĭ 11,21% mkă hŏng wưng anei thŭn dih, êgao hdră kčah leh anăn dôk hlăm êpul alŭ wăl mâo hnơ̆ng đĭ kyar lu mơ̆ng kluôm ala. Bruă tuh tia mkra mjing - rŭ mdơ̆ng, bruă nah tluôn - hiu čhưn ênguê leh anăn duh bi liê knŭk kna dôk mjing boh kdrŭt yuôm bhăn. Čiăng krơ̆ng hnơ̆ng đĭ kyar, čar mđing mđĭ hnơ̆ng mkra mjing, hnơ̆ng jăk mnuih mă bruă, ruh mtlaih klei kpăk gun hdră bruă leh anăn pŏk mlar wăl đĭ kyar ti Vân Phong. Anôk lăn đĭ kyar mơ̆ng Khánh Hòa adôk lu, ƀiădah hnơ̆ng đĭ kyar klă sĭt srăng jưh knang kơ hnơ̆ng ngă bruă mơ̆ng bruă kđi čar.

VOV.Êđê- Hlăm jih 7 thŭn êgao, leh mmông hriăm, mmông mă bruă pưk hma, phung mniê êra Bahnar, Jarai ti čar Gia Lai lŏ nao ti tač čưng boh Đak Đoa hriăm čưng boh. Klei gĭr anăn ba êpul truh kơ klei pah mni mrô sa Klei bi lông čưng boh mniê dŭm djuê ana mnuih djuê ƀiă Việt Nam thŭn 2026. Mlan 9 leh êgao, êpul dưi jao kơ Êpul hgŭm čưng boh Hoàng Anh Gia Lai, mđing truh kơ Klei bi lông čưng boh mniê kluôm ala thŭn 2027.

VOV.Êđê- Hruê mbruê 15/10, ti Sang bruă kƀĭn ala, Khua bruă kƀĭn ala Trần Thanh Mẫn drông leh khua gĭt gai gưl dlông Đảng yang ƀuôn krŭ kdơ̆ng Lao leh anăn Êpul bi ala gưl dlông mơ̆ng Đảng yang ƀuôn krŭ kdơ̆ng Lao ƀri gưl hriê čhưn klă sĭt ti Việt Nam.

VOV.Êđê- Tlam mbruê (15/10), ti Hà Nội, Khua gĭt gai Đảng, Khua lăn čar Tô Lâm mbĭt hŏng Êpul bi ala Anôk bruă kƀĭn ala ƀuôn prŏng Hà Nội mă bruă hŏng Êpul gơ̆ng bruă ƀuôn sang, Knơ̆ng bruă sang čư̆ êa, Dhar bruă mặt trận čar kwar Việt Nam ƀuôn prŏng Hà Nội êlâo kơ klei bi kƀĭn tal 2, Anôk bruă kƀĭn ala gưl 16.

VOV.Êđê- Hruê mbruê (15/10), ti Hà Nội, mkŏ mjing leh hdră Khua knŭk kna bi blŭ hrăm hŏng phung êdam êra Việt Nam thŭn 2026 hŏng akŏ: "Mđĭ lar bruă klam phung êdam êra Việt Nam hlăm hdră mphŭn čô̆ kơ bruă, mlih mrâo hŏng klei mbruă, đru mtrŭt mđĭ klei đĭ kyar leh anăn mjing bruă mă".

VOV.Êđê- Hruê (15/10) ti Anôk bruă knŭk kna, Khua knŭk kna Lê Minh Hưng gĭt gai Klei bi kƀĭn online pŏk ngă Hdră kñăm ala čar mđĭ kyar dhar kreh - ala ƀuôn, krĭng ƀuôn sang, djuê ana leh anăn krĭng čư̆ čhiăng wưng thŭn 2026- 2035.

VOV.Êđê- Hruê 14/10, Êpul bi ala bruă kƀĭn ala čar Dak Lak mkŏ mjing klei bi kƀĭn mă klei blŭ mguôp hŏng dŭm klei čih mkra hdră bhiăn ba mdah ti Klei bi kƀĭn tal dua, Bruă kƀĭn ala gưl XVI.