VOV.Êđê- Nay H’Wer (djuê ana Jarai) jing sa čô êdah êdi kơ ai tiê gĭr ktưn kpưn đĭ, hgao klei dleh dlan lehanăn ngă bruă duh mkra hơĭt kjăp ti krĭng mnuih djuê ana ƀiă čar Gia Lai. Ung luič, hjăn păn rông 5 čô anak hriăm hră tŭ jing, ñu amâo djŏ knŏng gĭr ktưn kpưn đĭ jing ƀĭng ngă lŏ hma mbruă gưl čar, ƀiădah lŏ nao hgŭm hlăm hdră đru kơ ala ƀuôn, myơr lăn mkra êlan, đru mkŏ mkra krĭng ƀuôn sang mrâo. Klei yăl dliê kơ klei hdĭp lehanăn hdră mă bruă mơ̆ng Nay H’Wer dôk lar bra asăp hưn mthâo kơ klei gĭr, klei thâo săng lehanăn klei đua klam hŏng êpul êya, đru bi mlih krĭng ƀuôn sang

VOV.Êđê- Dŭm hruê êgao, dŭm anôk mkra mjing, mnia blei mnơ̆ng dhơ̆ng lŏ hma ti čar Dak Lak dôk mđĭ hnơ̆ng mkra mjing, mlih mrâo rup mnơ̆ng dhơ̆ng, rơ̆ng mnơ̆ng dhơ̆ng duh kơ klei čiăng yua đĭ mơ̆ng mnuih ƀuôn sang. Boh nik ti krĭng nah Ngŏ čar, wăt tơdah hmăi kyua êa lip angĭn êbŭ ngă, lu anôk bruă, boh nik dŭm anôk bruă mnơ̆ng dhơ̆ng OCOP, pral kơrŭ wĭt bruă ngă kơ yan mnia blei lu snăk hlăm gưl Tết

VOV.Êđê- Leh klei tŭ jing mơ̆ng Klei bi kƀĭn Đảng tal XIV, ai tiê mlih mrâo, klei čang hmăng duh myơr dôk mâo ktang phĭt hlăm phung êdam êra mnuih djuê ana ƀiă ti Lâm Đồng lehanăn Dak Lak. Phung êdam êra Mnông dôk đru mguôp krơ̆ng kjăp knhuah dhar kreh, ba anăp hlăm dŭm hdră bi lông ktưn gưl nah gŭ.

VOV.Êđê- Hlue ngă hdra êlan mơ̆ng Phŭn bruă kđi čar kơ klei mkŏ mjing sang hră ti dŭm să knông lăn ti lăn hang wưng 2025–2026, čar Dak Lak mâo Gưl dlông đru 389 êklai prăk bi liê mkŏ mjing 3 sang hră knŭk kna rông ba mlir gưl ti dŭm să Ƀuôn Đon, Ia Lôp leh anăn Ia Rve. Leh giăm 3 mlan rŭ mdơ̆ng, phung rŭ mdơ̆ng bi leh 1/3 hnơ̆ng bruă. Knơ̆ng bruă sang čư̆ êa čar Dak Lak gĭt gai bi liê, anôk bruă rŭ mdơ̆ng leh anăn dŭm alŭ wăl mđĭ pral hnơ̆ng, gĭr bi leh leh anăn jao hdră bruă ba yua êlâo kơ mlan 8 thŭn anei.

VOV.Êđê- Mơ̆ng sui hŏng anei, ana boh đung siă suôr leh hŏng krĭng lăn mtlai čuah ti alŭ 7, să Hàm Thuận, čar Lâm Đồng. Anei jing sa mta ana ƀuh klă klei bi mlih ti krĭng lăn anei, jing klei bi êdah kơ klei mĭn, hgao klei dleh dlan mơ̆ng mnuih ƀuôn sang tinei. Gru hmô rông mnŭ gŭ êyui kyâo ana đung mơ̆ng ƀĭng ngă lŏ hma Lê Văn Thuận, să Hàm Thuận, čar Lâm Đồng dôk mđĭ lar boh tŭ ba hnư hrui wĭt hơĭt.

VOV.Êđê - Mơ̆ng dŭm kdrăn pla djam ba yua kdrăp mrâo truh kơ dŭm gru hmô bi hgŭm bruă pla, mkra mjing, hdră mkŏ mkra krĭng ƀuôn sang mrâo hlăk lehanăn dôk bi mlih klă sĭt krĭng ƀuôn sang pla djam mtam ti Đơn Dương, čar Lâm Đồng. Mnuih ƀuôn sang tinei klă sĭt jing pô phŭn mơ̆ng hdră mđĭ kyar, ƀrư̆ ba lŏ hma mŭt hlăm hdră bi hgŭm mđĭ boh tŭ yuôm kluôm, mđĭ hnư hrui wĭt lehanăn hnơ̆ng tŭ jăk klei hdĭp.

VOV.Êđê- Thŭn 2025, hlăm boh klei duh mkra adôk lu klei dleh dlan, hiu čhưn ênguê Khánh Hòa ăt mđĭ lar hnơ̆ng đĭ kyar jăk, lŏ dơ̆ng bi mklă bruă klam jing kmeh gơ̆ng yuôm bhăn mơ̆ng bruă duh mkra alŭ wăl. Mŭt hlăm thŭn 2026, kluôm bruă hiu čhưn ênguê čar dôk pral mprăp klei găl jăk hĭn, srăng drông tue hiu čhưn hlăm ai êwa hơ̆k mơak, êđăp ênang leh anăn jăk.

VOV.Êđê - Dŭm thŭn giăm anei, êpul mnuih mâo Kơhưm dưi dlăng msĕ si “Ana mŭt akŏ êa” lar bra ai tiê đua klam, ba akŏ hlăm êpul êya. Hŏng kơhưm mơ̆ng pô, diñu hlăk dôk đru mguôp ai tiê mkŏ mkra ƀuôn sang ti dŭm krĭng mnuih djuê ƀiă ƀrư̆ hruê ƀrư̆ đĭ kyar lehanăn K’Bé ti să Phan Sơn, čar Lâm Đồng jing sa hlăm dŭm čô msĕ snăn.

VOV.Êđê- Hlăm hruê kăm akŏ thŭn mrâo 2026, čar Dak Lak drông lu tuê hiu čhưn ênguê lehanăn êngao ala čar hriê hgŭm, tui ksiêm. Mbĭt hŏng klei găl kơ lăn mnga êa mơak lehanăn yan adiê, bruă ba yua dŭm boh tŭ yuôm dhar ktreh êpul êya, boh nik wăl anôk dhar kreh čing čhar, hlăk jing gru kruăk mjing klei tluh tluñ kơ hdră hiu čhưn ênguê alŭ wăl.

VOV.Êđê- Mŭt hlăm thŭn mrâo 2026 ti ƀuôn Čam ti să Bắc Bình, čar Lâm Đồng lŏ dơ̆ng guh mngač hŏng êa mil mngač, jăk siam. Klei trei mđao, yâo mơak anăn amâo djŏ knŏng jing klei bi mlih kơ krĭng ƀuôn sang mrâo ƀiădah jing klei bi mlih hlăm hdră duh mkra grăp gŏ sang lehanăn hnơ̆ng tŭ jăk klei hdĭp mda mơ̆ng lu mnuih ƀuôn sang Čam tinei.