VOV.Xơ Đăng - Ing apoăng hơnăm 2026 troh nôkố, Dak Lak ai vâ chê 2.500 ngế tro tơngê lo mơheăm tâ tung 102 to cheăm, bêng, tâk châ dâng 10% tâng vâ pơchông ƀă roh kố dêi hơnăm nah. Tung pơla mê, kơxô̆ mơngế ki tâ pơreăng kố rế hía thăm rế kơdrâm, hên ngế xuân ối tơngôu, ôh tá vâ rĕng khăm pơlât, drêng tâ dêi tơná hiăng râ mê nếo troh a hngêi pơkeăng. Tơdrêng ƀă mâu tơdroăng ki pá puât ‘na mơngế, kế tơmeăm khăm pơlât ƀă kơxô̆ liăn ki vâ rôe pơkeăng chôu ‘măn a hngê pơkeăng cheăm, ing mê kô tơ’lêi pro pơreăng thăm rế xông tâ tú hên.

VOV.Xơ Đăng - Tơbleăng Pơkâ kơxô̆ 72 dêi Khu xiâm ngăn cheăng kal kí “ ‘Na mâu troăng hơlâ mơnhông, thăm mơdêk rak vế, rak ngăn ƀă mơnhông ivá kuăn pơlê”, kong pơlê Dak Lak hiăng xoăng 400 rơtal liăn vâ xoăng ăm mâu cheăm bêng tơbleăng khăm rêm khế, khăm séa ngăn ivá ăm tâi tâng kuăn pơlê hơnăm 2026.

VOV.Xơ Đăng -  “Tŏng rêh môi ngế luâ tâ pro 7 to thôt” cho túa tơmiât dêi mâu ngế cheăng tung Kâu lak ƀô̆ Khu ngế ki ai mơheăm kơnía O Rh- kong pơlê Dak Lak. Xua mê, rêm rôh ai vâi khĕn pơlât tơdrêng kal pleăng mơheăm, vâi ôh tá tơmiât troh hâi măng, tíu ối, mê vâi đi đo ai mâ a hngêi pơkeăng, djâ vế tơdroăng tơngah rêh ăm mâu ngế ki tá hâi hmâ. Tơdroăng pêi ki lĕm mê dêi vâi ôh tá xê to tŏng pơlât hên ngế ki kal mơheăm mê ối tơdjâk hiâm mơno ki lĕm, pâ nhuô̆m ƀă pôu râng ƀă pơlê pơla, veăng gum mơjiâng môi pơlê pơla tŏng gum, tơrŭm ƀă mơnhông.

VOV.Xơ Đăng - Drêng hlo ai mâu ngế ki tro pơreăng tơngê lo mơheăm tâk hên, kô tơ’lêi trâm tơdroăng ki pơreăng kân, mê kơvâ ngăn ‘na pơkeăng ƀă khăm pơlât a mâu kong pơlê a kpơng Tây Nguyên dế pơkâ pêi pro tơdrêng mâu troăng hơlâ vâ kơdroh tơdroăng ki tro tâ tú pơreăng ki nếo, ing mê, teăm châ mơdât tơdroăng ki pơreăng xông tâ tá, ki rơhêng vâ tối, tung pơla mâu kong pơlê dế mot tung rơnó mê hngêi. Tơdroăng “Ivá ăm rêm ngế” hâi kố, ngin ai tối tơbleăng ‘na pơreăng tơngê lo mơheăm hiăng tâ tú hên a lâp kơpong Tây Nguyên a tung rơnó mê hngê kố.

VOV.Xơ Đăng - Tơdrêng ƀă tơdroăng tô tuăn ‘na kong mêi khía têa lân lu, mê kơpong Tây Nguyên pơxiâm mot rơnó mêi xuân cho rôh pơreăng ki rơ-iô pơxiâm tâ tú. Tơdroăng nếo ai ƀă tơdroăng kal pêi tơdrêng tơdroăng mê dế châ mơdêk pêi a kơlo tơbleăng tối drêng sap apoăng hơnăm troh nôkố, kong pơlê Dak Lak tối hiăng ai 1.518 ngế tro tơngê lo mơheăm a 14 tíu ai hên tơngê, tâk 154% tâng vâ pơchông ƀă hơnăm nah.

VOV.Xơ Đăng - Hrá ‘nâi tơpui hmâ trâm a vâi hdrêng sap ing 6 khế troh 3 hơnăm, cho tơdroăng ki rế hía rế hlo hên pro mâu nôu pâ chiâng tôu tuăn. Hrá ‘nâi tơpui a vâi hdrêng xua ing hên tơdroăng, mơni ing túa châi tamo, hiâm mơno ƀă tơdroăng rêh ối. Xua mê, nôu pâ kal séa ngăn krâu mâu khế hơnăm ‘nâi tơpui vâ rĕng ‘nâi ƀă rĕng teăm ai troăng hơlâ, rak vế tơniăn tơdroăng mơnhông tŭm têk a vâi hdrêng.

VOV.Xơ Đăng - Khăng kơbrĕn, chó chêng, tơvê kŏng cho môi túa ki châi tamo tâ kâ̆p tĭnh rơ-iêo xua virus pro, mơni kô pro chó chêng tơvê kŏng hlô̆ng hlối, malối cho a vâi hdrêng tơxĭn. A kong pơlê Dak Lak, mâu hơnăm hdrối nah, kơnôm ing tơbleăng pâk tơƀrê Tơdroăng pâk pơkeăng po rơdâ, pơreăng khăng kơbrĕn, chó chêng, tơvê kŏng hiăng châ hbrâ mơdât tơƀrê, veăng gum rak vế ivá châ chăn vâi hdrêng a kong pơlê. Laga, tung pơla achê kố vaccine OPV hbrâ mơdât khăng kơbrĕn, chó chêng tơvê kŏng tro piu lôi, xiâm kối cho xua ki hlê plĕng tá hâi tŭm dêi kuăn pơlê.

VOV.Xơ Đăng - Tung dế têa kơxĭ, tíu ki kơtăn ing tơnêi châ dâng chât, dâng hrĭng km, hnoăng cheăng khăm pơlât a kơpong pêi cheăng kâ Phú Quý đi đo trâm hên tơdroăng pá puât, xua ôh tá hâi ai mơngế mơngế cheăng ki rơkê păng ‘nâng, tơdroăng ki pơto chơ djâ mơngế châi tamo ối xahpá, xua hyôh kong prâi ƀă mâu toăng tuk ki pơto chơ ối tơvâ hên tơdroăng. Drêng rế hía ai rế hên tơdroăng ki tơdah pơlât tơdrêng mơngế xía vâ, châi tamo, mê kơvâ ngăn ‘na  pơkeăng ƀă khăm pơlât kong pơlê Lâm Đồng dế tơkŭm mơnhông ivá cheăng ki vâ ai tŭm kế tơmeăm tơdah pơlât todrêng, hnê mơjiâng mâu ƀok thái pơkeăng ki rơkê păng ‘nâng ƀă mơ’no liăn rôe pơkeăng, tơmeăm khăm pơlât a chuăn têa kơxĭ.

VOV.Xơ Đăng - Châi tamo sap ing tơxĭn xuân cho môi tung mâu xiâm kối tơdjâk troh ivá châ chăn, tơdroăng ki rơkê plĕng tung rêh kâ ối dêi lối chât rơpâu ngế vâi hdrêng Việt Nam rêm hơnăm. Tung pơla mê, hên tơdroăng châi tamo a kuăn ngá gá chiâng vâ rĕng châ ‘nâi lơ hbrâ mơdât tơƀrê ing mâu rôh lăm khăm kuăn ngá rêm hneăng ƀă séa ngăn hdrối vâ rơneh. Mơdêk ki hlê plĕng dêi vâi kơdrâi mơ-êa ‘na tơdroăng kố dế cho troăng hơlâ ki kal vâ rak vế tơniăn hdrêng châ rơneh ivá mo sêi.

VOV.Xơ Đăng - Mâu kong pơlê kơpong Tây Nguyên dế mơdêk mơdêi troăng hơlâ ‘mâi mơnhông khăm pơlât, mơdêk ki rơkê plĕng tung khăm pơlât apoăng ăm kuăn pơlê.