VOV.Xơ Đăng – Khu kăn teăng mâ Kuô̆k hô̆i kong pơlê Dak Lak nếo tơkŭm po roh Hôp tơmâng xo rơkong tơpui tối ‘na Tơdroăng tơkêa bro luât vâ pơtroh ăm Hneăng hôp má môi, Kuô̆k hô̆i hneăng XVI. Roh hôp kố tơkŭm tơpui tơno 4 tơdroăng tơkêa luât, tung mê, ai: Luât Châ ‘nâi châ tâng tơdroăng nếo ai (‘mâi pơhlêh), Luât ‘mâi pơhlêh, bro thăm mâu tơdroăng dêi Luât Tŏng gum hnê pơtâng ‘na luât, Luât Inâi rơpŏng hngêi (‘mâi pơhlêh) ƀă Luât ‘mâi pơhlêh, mơjiâng bro thăm mâu tơdroăng dêi Luât Kŏng chư̆ng. Tơdroăng “Kuô̆k hô̆i ƀă kuăn pơlê” hâi kố ngin ai tối ‘na tơdroăng mê.

VOV.Xơ Đăng – Pôa Trần Thanh Mẫn, Kăn xiâm hnê ngăn Kuô̆k hô̆i mơnhên, troh nôkố, tơdroăng hbrâ ăm Hneăng hôp má môi, Kuô̆k hô̆i hneăng má  XVI ki xiâm hiăng châ hbrâ tơdâng tŭm tâi tâng, inhên, pêi tiô troăng hơlâ, troăng prôk kân dêi Đảng, pơkâ dêi tơdroăng nôkố ƀă pơkâ dêi luât.

VOV.Xơ Đăng - Pôa Lương Nguyễn Minh Triết, Kăn pơkuâ hnê ngăn cheăng Đảng kong pơlê Dak Lak nếo lăm séa ngăn tơdroăng ki ai khât nôkố mâu tíu tối hdrối mơjiâng hngêi hôp tơdjuôm pơlê pơla hlối pêi pro tơdroăng hbrâ, ví têa kân lân lu a cheăm Hòa Mỹ ƀă Hòa Thịnh.

VOV.Xơ Đăng – Hô̆i đong tâ phĭu tơnêi têa nếo tơbleăng Pơkâ dêi Hô̆i đong tâ phĭu tơnêi têa ‘na klêi kơ’nâi pôk ƀă inâi mâu ngế ki châ kuăn pơlê pôk cheăng tung Kuô̆k hô̆i hneăng 16. Rôh tâ phĭu kố châ mơnhên tối tơkŭm po tơniăn lĕm, tro luât, kơdĭng ƀă ƀlêi chiâng, cho Hâi leh kân dêi tâi tâng kuăn pơlê.

VOV.Xơ Đăng – Pêi pro Hnê mơhno dêi Khu xiâm cheăng kal kí, rơtế ƀă 121 to hngêi trung hriâm tung lâp tơnêi têa, Tây Nguyên – Nam Trung ƀô̆ tơkŭm pơxiâm mơjiâng pro Hngêi trung Phôh thong ai tíu kâ koi ối pơtê péa râ Râ má môi – Râ má péa a kơpong tơkăng kong tơnêi ‘lâng. Tơdroăng kố, ai pơxúa ‘na cheăng kal kí, pơlê pơla ƀă hlê trâu hngế ‘na túa lĕm tro, mơhno tơdroăng ki tơmâng ngăn tŏng gum dêi Đảng, Tơnêi têa tung ‘no liăn pro tíu ki vâ hnê hriâm a mâu cheăm tơkăng kong tơmiât troh hnê mâu ngế cheăng akố ƀă ‘mâi mơnhông kơpong tơkăng kong krá tơniăn.

VOV.Xơ Đăng - Hâi lơ 17/3, a rôh pêi cheăng ƀă khu ki lăm ngăn dêi Khu xiâm rak liăn ngân ‘na tơdroăng ki ăm mung liăn tŏng gum tiô Pơkâ 78/2002 dêi Chin phuh, kong pơlê Dak Lak pâ thế mơdêk kơlo mung liăn ƀă mâu rơpŏng kơtiê, hok tro, sinh viên; tơdrêng amê hlối po rơdâ mâu ngế ki mung liăn vâ lăm pêi cheăng a kong têa ê.

VOV.Xơ Đăng - Hâi lơ 15/3/2026, vâ chê 2,6 rơtuh ngế kuăn pơlê dêi kong pơlê Gia Lai hiăng lăm tâ phĭu pôk kăn Kuô̆k hô̆i hneăng XVI. Hên kơdrâm kuăn pơlê hiăng tối tơdroăng kal vâ ‘nâi plĕng, hlối pơtroh mâu tơdroăng púi rơhêng vâ loi tơngah tung mâu kăn Kuô̆k hô̆i hneăng ki nếo.

VOV.Xơ Đăng - Hâi leh kân tâ phĭu pôk khu kăn xiâm Kuô̆k hô̆i hneăng 16 ƀă Hô̆i đong hnê ngăn kuăn pơlê rêm râ hneăng hơnăm 2026-2031 dế hiăng vâ chê troh. A kong pơlê Dak Lak, tâi tâng 102 to cheăm, bêng dế thâ pêi pro rĕng kêi hnoăng cheăng hbrâ rơnáu mê, ing mâu kuăn mơngế, liăn ngân, kế tơmeăm troh a túa cheăng, rak vế tơniăn ăm hâi leh kân dêi kuăn pơlê. Tơdrêng ƀă tơdroăng mê, hnoăng cheăng hnê pơtâng tối kố thăm châ pêi pro ó rơdêi, mơhnhôk châ lối 2 rơtuh 420 rơpâu ngế kuăn pơlê ‘nâi klê nhên vâ lăm rah xo mâu ngế ki tơxâng, ai tuăn hiâm lĕm tơdrăng, rơkê khât, tơxâng cho mâu ngế ki teăng mâ vâ pơkâ, vâ pêi pro tiô hiâm mơno pói rơhêng vâ dêi kuăn pơlê.

VOV.Xơ Đăng - Hâk vâ chê troh tâ phĭu rah xo kăn teăng mâ Kuô̆k hô̆i hneăng má XVI ƀă kăn teăng mâ Hô̆i đong kuăn pơlê mâu râ, hneăng hơnăm 2026 – 2031, a kơpong tơkăng kong kong pơlê Gia Lai, khu mô đô̆i gâk ngăn tơkăng kong rơtế khu cheăng kal kí ƀă mâu râ kuăn pơlê pơrá mơhno tơdroăng loi tơngah ƀă hiêm mơno pôu râng hnoăng kân. Mâu kong pơlê hiăng hbrâ inhên vâ tâi tâng mâu ngế ki tâ phĭu kơpong tơkăng kong pơrá châ veăng Hâi xah hêi ro tơnêi têa.

VOV.Xơ Đăng - Hơnăm 2026, tơdroăng ki mơ’no tê kế tơmeăm dêi Việt Nam dế trâm tơdroăng ki nếo, ôh tá xê cho tơdroăng ki vêh mơnhông tơdroăng ki pêi kâ ôh tá rơhéa ton hơnăm dêi lâp plâi tơnêi, mê ối cho vâ vêh mơnhông hdró tơdroăng ki thăm mơdêk nếo rak vế krá tơniăn ton ƀă krá kâk. Tiô mâu ngế ki hriăn cheăng, tơdroăng mơ’no tê kế tơmeăm pơkal athế pơtối mơdêk hnoăng cheăng cho ki xiâm, tơdrêng amê, hnối mơdêk ó rơdêi tơdroăng ki thăm pêi lo kế tơmeăm châ thăm rế hên tiô kơ tơdroăng ki krá kâk, tơhluâ, ƀă krá tơniăn, hlối pêi pro adrêng ƀă mơdêk ki kơnâ dêi kế tơmeăm, ‘na hnoăng cheăng kŏng ngê̆ ƀă ivá cheăng dêi túa pêi cheăng kâ.