VOV.Xơ Đăng - Klêi kơ’nâi pêi pro khu râ kăn pơkuâ pơlê péa râ, kơxô̆ tơdroăng cheăng a râ cheăm tâk châ hên xôh. Hdrối tơdroăng ki pôu râng hngăm tơdroăng cheăng mê, khu kăn ƀô̆ pơlê a kơpong kong ngo kong pơlê Quảng Ngãi hiăng hbrâ rah xo bro lế lĕm tro tơdroăng cheăng, pôu râng hên kơvâ, tơdroăng mơ-eăm ‘’pôu râng tơdroăng cheăng’’ vâ tơniăn pêi cheăng hlâu lĕm ƀă gum kuăn pơlê. Tơdroăng achê kuăn pơlê, tiô kuăn pơlê xuân gum kăn ƀô̆ teăm tơdrêng ‘nâi tơdroăng, tơpui pêi pro tơdroăng ki nếo ing pơlê cheăm.

VOV.Xơ Đăng - Rơpâu pŭm gât khêi hdrâ ƀă dêi rơpó pa kĭng têa kơxĭ. Mâu hngêi ai pái veăng hlo ki hiăng ton hơnăm drêng prôk drô troăng pơlê lĕm krúa. A kơno plong hên vâi tê ká xi xŏng peăng kơxo má ƀă a kong xêi măng drêng plong tơnăng ká troh. ‘Núa têa kơxĭ ai prêi ƀă têa ngiât. Tâi tâng mê tơkŭm ƀă chiâng ki lĕm krê a têa kơxĭ…  Mê cho pơlê Lò, môi pơlê ton nah a kĭng têa kơxĭ bêng Hòa Hiệp, kong pơlê Dak Lak, cho môi tíu ki vâ pơtih tơdroăng pro ôm hyô a tơmeăm ton nah.

VOV.Xơ Đăng - Kong pơlê Lâm Đồng dế ‘no liăn pêi tơdrêng, pơ’lêh tiô túa nếo Tíu xiâm pêi cheăng râ cheăm, mơdêk ki tơƀrê tung bro hlá mơ-éa. Ƀă pêi cheăng kơxô̆ châ mơdêk tơƀrê, pơkâ pêi tơdrăng, râ cheăm chiâng tíu ki “tơviah lĕm’’ achê kuăn pơlê, achê tơdroăng cheăng.

VOV.Xơ Đăng - A thôn Phú Hạnh, cheăm Tuy An Đông, kong pơlê Dak Lak ao môi to pơlê ki ton hiăng lối hrĭng hơnăm. Tíu kố châ hên ngế khê̆n cho “Pơlê dêi hmốu” xua ai mâu kế tơmeăm pro ƀă hmốu lĕm tơviah môi tiah tíu ‘măn rak hmốu ki chiâng xêh. Nôkố pơlê kố xuân ối ai hênmâu klôh têa meăm ƀă hmốu, troăng, kơnâng pro ƀă hmốu tơ’mot hên tơmối troh ôm hyô xua tíu kố gá lĕm krê xêh ƀă chiâng tíu troh ki nếo châ vâi ô eăng tung rôh lăm troh a kơpong tơnêi Phú Yên nah.

VOV.Xơ Đăng - Klêi kơ’nâi 50 hơnăm châ tơleăng lĕm, 40 hơnăm pơ’lêh nếo, hên mâu kuăn pơlê a Dak Lak hiăng lo ing tơdroăng pêi bê kâ rơtế ƀă tơdroăng mơnhông tơdjuôm dêi tơnêi têa. Troăng prôk châ tôh kơxu tơdjêp ing pơlê cheăm troh a mâu kơphô̆, on tơhrik bâ eăng troh a plông hngêi; kuăn ‘nĕng ki lăm hriâm hơngế klêi mê vêh a pơlê, djâ tơdroăng ki tơná hiăng plĕng tung hriâm ki plĕng, veăng ‘no hnoăng pêi cheăng pơ’lêh rêh ối, cheăng kâ dêi kuăn pơlê. La tơdroăng ki tơxâng vâ tối akố, ôh ti xê to a mâu kơxô̆ tâk hên, parŏng tơdroăng rêh ối nôkố cho ki ai pơxúa dế châ rak vế krá tơniăn a hên pơlê; pro ăm tâ hơniâp pơxiâm ing khôi túa, vêa vong lĕm tro dêi kuăn ngo tơná.

VOV.Xơ Đăng – Kơxo ah lơ 15/3, kuăn pơlê tung lâp tơnêi têa lăm tâ phĭu pôk kăn Kuô̆k hô̆i hneăng XVI ƀă kăn Hô̆i đong hnê ngăn kuăn pơlê pơla hơnăm 2026-2031. A Dak Lak, rơtế ƀă mâu rôh hbrâ rơnáu ‘na tơkŭm po krâu, nhên, cheăng hnê tối châ mơdêk rơdêi ƀă hên túa ki rơkê. Malối, tơdroăng ki xoăng phĭu pôk troh a kŏng kuăn pơlê hiăng ƀă dế châ tơbleăng pro tung lâp lu, gum ăm tơdroăng hnê tối ‘na rôh tâ phĭu tơdjâk trâu rơdâ, pro chiâng tơdroăng ki tơkôm troh hâi leh kân dêi tâi tâng kuăn pơlê.

VOV.Xơ Đăng - Hơnăm 2025 kố nah, kơxô̆ ki pêi pro hlá mơ-éa ăm kuăn pơlê ƀă khu mơdró dêi kong pơlê Gia Lai châ 96,63 điêm, ối má 2 tung lâp tơnêi têa, cho dêi mâu kong pơlê pêi cheăng ki tơtêk. Veăng pro châ pơxúa mê, ai hnoăng  veăng ‘no ing mâu kăn cheăm bêng, tíu kăn ƀô̆ dế pêi cheăng ƀă kuăn pơlê mâu hdroâng kuăn ngo ƀă plâi nuih ƀă hnoăng cheăng tơná ƀă kuăn pơlê. Mê cho a Tíu xiâm pro hlá mơ-éa dêi cheăm Đăk Đoa, kong pơlê Gia Lai, tíu ai lối 38% pơ’leăng mâ mâu kuăn ngo. Pó vâi krâ nhŏng ƀă pú hmâ kô tơmâng.

VOV.Xơ Đăng - A cheăm Đam Rông 4, kong pơlê Lâm Đồng, túa pêi cheăng Tôh tơrŭm cheăng dêi vâi kơdrâi pêt loăng yâu păn hdrong xo prế dế chôa ‘lâng mơhno ki pơxúa, chiâng troăng pêi tơtro tung pơ’lêh hdrê loăng plâi, tăng cheăng kâ tơniăn ăm hên vâi kơdrâi kuăn ngo K’Ho. Ing ƀăng tơnêi pêt kơphế ki ôh tá tơƀrê, hên rơpŏng hngêi hiăng khên pơ’lêh pêt loăng yâu păn hdrong, chôa lâng mơdêk pêi lo liăn ƀă hơ’lêh tơdroăng rêh ối. Ing mê, tơrŭm krá pơla mâu ngế tung khu ing tơdroăng tối túa pêi cheăng, kơjo gum dêi rơpó ‘na kih thuât ƀă tơmeăm khoăng, hlối veăng pơ’lêh hlê plĕng, chôa tah túa tơlá ton nah ki ôh pá tro tung pêi chiâk deăng.

VOV.Xơ Đăng – Dak Lak cho kơpong tơnêi ki ai hên tơmeăm khoăng pêi lo ing chiâk deăng ƀă hên tơmeăm xiâm krê hiăng châ tối rơdêi inâi. Tung mâu hâi rơnó Hơngui, kuăn pơlê ƀă tơmối mê vâi hlo nhên tâ ki kơnía dêi mâu tơmeăm OCOP ing mâu kế kâ ki châ tơbleăng ‘măn a kơƀeăng, rếm túa kế kâ tơdjâk ing hơpiâp on. Sap ing kơphế, têa kơdruâ, plâi kâ ki châ têng kơ-óu troh mâu kloăng, pơ’leăng ki ai trếo kơhiâm lĕm, mâu tơmeăm kâ krê dêi pơlê nôkố hiăng chiâng tơdroăng ki lĕm, veăng gum pro chiâng “kế kơnía rơnó hơngui” rế achê, rế hlo xúa hên hĭn tung rêm rơpŏng.

VOV.Xơ Đăng - Mot tung hơnăm nếo 2026, tơdroăng xut tah hrâ mơnguâ kơtiê xơpá, mơnhông cheăng kâ a pơlê Dơk Rơng, cheăm Đak Đoa, kong pơlê Gia Lai hiăng pơhlêh khât. Ki phiu ro akố cho kuăn pơlê Bơhnéa hiăng ‘nâi kơdôu mơ-eăm, hluăn ing kơtiê, pro kro mơdrŏng, mơjiâng tơdroăng rêh ối phâi hơtô, hơniâp lĕm. Ƀă tơdroăng tơmâng ngăn dêi Đảng, Tơnêi têa, tơdroăng tơrŭm ƀă ivá mơ-eăm mơnhông cheăng kâ, kuăn pơlê Dơk Rơng dế tơngah mơ-eăm krá rơdêi tâ.