VOV4.Xơ Đăng - Ing apoăng hơnăm 2023, tiô tơdroăng pơkâ Kơxô̆ 148/QĐ-TTg dêi Ngế pro xiâm hnê ngăn Chin phuh, tơdroăng ki ôm hyô pơlê pơla, tơdroăng ôm hyô ‘na loăng pơlái, kong kế ƀă tíu ôm hyô cho môi tung 6 hnoăng pêi tung Tơdroăng rêm cheăm môi tơmeăm -OCOP. Laga, xua tá hâi teăm ai tơdroăng tơrŭm, tơdjêp dêi pó, klêi kơ’nâi 1 hơnăm tơdế pêi pro, Dak Lak xuân tá hâi teăm mơjiâng tơdroăng ki dó inâi Rêm cheăm môi tơmeăm OCOP ôm hyô ki lâi ôh.

VOV4.Xơ Đăng - Pêi pro Pơkâ kơxô̆ 07 – NQ/TƯ hâi lơ 3/3/2003 dêi Khu pơkuâ hnê ngăn cheăng Đảng kong pơlê Dak Lak ‘na ‘’Thăm pêi pro tơdroăng pơkuâ dêi Đảng a thôn, pơlê, tôh kơphô̆ kuăn pơlê’’, 20 hơnăm hdrối mê hía nah, kong pơlê hiăng ai 1.780 kơ koan, tíu cheăng, khu tê mơdró pro nhŏng o 556 pơlê kuăn pơlê hdroâng kuăn ngo. Sap ing kố, rơpâu tơmeăm, tơdroăng cheăng châ kăn ƀô̆, kŏng nhân, viên chưk, mâu lêng khu lêng a mâu tíu pro nhŏng o rơtế tơdjuôm ivá pêi pro, veăng kum thăm pro tơrŭm tâi tâng kuăn pơlê, tŏng kum kuăn pơlê mơ-eăm, mơdêk tơdroăng rêh ối.

VOV4.Xơ Đăng - Pêi pro tiô tơdroăng “Ngế veăng gum’’ xua Khu xiâm ngăn vâi kơdrâi Việt Nam mơhnhôk, rêm râ khu vâi kơdrâi a Lâm Đồng hiăng ai mâu tơdroăng cheăng pêi nhên khât, pơxúa, chiâng “Tíu tơngah” dêi mâu vâi hdrêng kuăn tê. Ing mê, gum mâu vâi o tâ tơtôu, môi tiah hơ-ui pâ, thăm mơ-eăm tâ nếo.

VOV4.Xơ Đăng - A hơnăm 2020, pơlê kong krâm Gia Nghiã cho tíu pêi cheăng râ tơring ki apoăng dêi kong pơlê Dak Nông châ ối má môi tơdroăng pơkâ dêi tơnêi têa mơjiâng thôn pơlê ƀă 2/2 to cheăm châ mơnhên tối. Pơxiâm mot hơnăm hriâm nếo, Gia Nghiã ai pơkâ mâu tơdroăng mơ-eăm khât ƀă mơjiâng mâu kơpong thôn pơlê mơnhông cheăng kâ, kro mơdrŏng túa lĕm tro ƀă ‘nâi mơjo pâ dêi rơpó. Mâu tơdroăng mơhnhôk, mâu tơdroăng châ tơbleăng pêi ƀă troăng hơlâ “Kuăn pơlê ‘nâi, kuăn pơlê tơpui, kuăn pơlê pêi’’ hiăng pro pơxúa khât.

VOV4.Xơ Đăng - Tối troh mơngế ki kuăn pơlê loi tơngah tung kơpong kuăn pơlê hdroâng kuăn ngo, rêm ngế hmâ tơmiât troh mâu ngế krâ pơlê, mâu ngế hơnăm hiăng krâ. Laga, ƀă kuăn pơlê a pơlê Labouye A, cheăm Lạc Xuân, tơring Đơn Dương, kong pơlê Lâm Đồng, ngế ki kuăn pơlê loi tơngah drêng bú nếo lối 40 hơnăm. Mê cho ngoh Ya Dũng, môi đảng viên hơnăm ối nếo ƀă cho kăn pơkuâ hnê ngăn thôn. Xua ti lâi Ya Dũng châ kuăn pơlê loi tơngah cho xua hmâ pêi tíu ki lâi, ngoh xuân đi đo cho ngế djâ troăng ahdrối.

VOV4.Xơ Đăng - Đông kăch măng H9 kong pơlê Dak Lak a rơxông pơplâ lêng Mih nah, nôkố tơkuăm 4 to cheăm ối kopong hơngế hơngo dêi tơring Krông Bông, tung mê, ai Čư̆ Pui, Čư̆ Drăm, Yang Mao ƀă Hoà Phong. Ƀă hiâm tuăn môi mơno tiô pro kăch măng dêi hdroâng Rơđế, M’Nông ki rêh ối a tơnêi tíu ai ngo Čư̆ Yang Sing kố, H9 cho tíu ki kring vế, rak ngăn ăm Đảng ƀô̆ kong pơlê Dak Lak tung plâ hneăng hơnăm 1965 - 1975. Pơtối mơdêk hnoăng cheăng dêi kăch măng, đông Kăch măng H9 hâi kố hiăng ai tơdroăng ki mơnhông hên kơvâ ƀă dế pơhlêh rêm hâi.

VOV4.Xơ Đăng – A tơring tơkăng kong Đức Cơ, kong pơlê Gia Lai ai môi to lâm hriâm a rơnó pơtê hriâm hiăng djâ hên tơdroăng ki ro, túa ki rơkê plĕng ai pơxúa ăm mâu vâi o tơxĭn hdroâng kuăn ngo ki ai tơdroăng rêh ối pá puât. Lâm hriâm tê kơtê kố châ mâu đoàn viên, droh rơtăm dêi pơlê kân Čư̆ Ty, tơring Đức Cơ hnê.

VOV4.Xơ Đăng - Kơ’nâi lối 2 hơnăm tơbleăng tơdroăng pơkâ 749 hơnăm 2020 dêi Ngế pro xiâm hnê ngăn Chin phuh ‘na pơhlêh kơxô̆ dêi tơnêi têa, kong pơlê Kon Tum hiăng pêi châ tơƀrê mâu tơdroăng pơkâ, malối tung kơvâ pêi chiâk deăng - thôn pơlê. Kong pơlê dế mơ-eăm tah ki xơpá vâ pơhlêh kơxô̆ rĕng tâ, troh mơjiâng pêi chiâk rơkê plĕng, thôn pơlê pêi cheăng kâ rêh ối tiô túa nếo.

VOV4.Xơ Đăng - Tung hơnăm kố nah, kong pơlê Dak Lak hiăng mơhnhôk rêm khu râ tăng hên liăn, pêi tơdrêng ƀă luât pơkâ ‘no liăn mơjiâng pro, ƀă tơdroăng kơjo kum dêi Đảng, Tơnêi têa troh mâu kuăn pơlê hdroâng kuăn ngo, kơpong hơngế hơngo. Tung mê, ai hên tơmeăm khoăng ‘mâi rơnêi pro troăng prôk tiô Tơdroăng pơkâ tơnêi têa mơnhông Cheăng kâ - rêh ối pơlê pơla kơpong kuăn ngo hiăng veăng ‘no hnoăng pêi tơƀrê mơnhông tơdroăng rêh ối dêi kuăn pơlê.

VOV4.Xơ Đăng – Hên hơnăm kố, Khu mâu lêng hneăng hdrối a pơlê kong krâm Ayun Pa, kong pơlê Gia Lai pêi ai pơxúa tơdroăng mơhnhôk “Mâu lêng hneăng hdrối djâ troăng ahdrối” tung tŭm tơdroăng cheăng mơjiâng ƀă mơnhông cheăng kâ. Ƀă tơdroăng ôh tá xâu xơpá, hên mâu lêng hneăng hdrối hiăng chiâng mâu ngế ki djâ troăng lĕm ahdrối kơhnâ pêi cheăng, mơnhông cheăng kâ dêi rơpŏng hngêi, mơhno tơbleăng troh lâp lu tơdroăng kơhnâ pêi cheăng tung kuăn pơlê a mâu pơlê.