VOV.Xơ Đăng - Pêi pro hnê mơhno dêi Chin phuh, Vi ƀan kuăn pơlê kong pơlê Dak Lak nếo pơkâ mâu hlá mơ-éa chêh pơkâ ‘mâi hơ’lêh, tơ’nôm lối 215 rơtal liăn vâ tơbleăng tung pơla rôh má 2 mơjiâng pro mâu hngêi trung hnê ai tíu kâ koi ối pơtê râ má môi ƀă má péa a tíu tơkăng kong.

VOV.Xơ Đăng - Hâi kố, lơ 3/8 pơxiâm Hneăng hôp ki ôh tá hmâ roh má 1, Kuô̆k hô̆i hneăng XVI. Vâ hbrâ ăm hneăng hôp kố, Khu kăn teăng mâ Kuô̆k hô̆i mâu kong pơlê a Tây Nguyên hiăng tơrŭm cheăng ƀă mâu kơ koan ki hriăn ngăn cheăng vâ tơmâng xo rơkong ki veăng tơpui tối ƀă mâu tơdroăng tơkêa ‘na luât, tơdroăng pơkâ ki kal. Kố cho tơdroăng cheăng vâ pơtối mơdêk hnoăng cheăng ki kal pơla mâu kuăn pơlê ƀă Kuô̆k hô̆i, rak vế tơniăn mâu troăng pơkâ ‘na luât drêng mơ’no mâu troăng hơlâ ki vâ séa mơnhên ngăn ki păng ‘nâng, tơtro tiô tơdroăng pơkâ ki nếo tung mơnhông a chal nếo kố.

VOV.Xơ Đăng - Sap ing kơxô̆ liăn mâu  Tơdroăng pơkâ dêi tơnêi têa, kong pơlê Quảng Ngãi hiăng ‘mâi pro, rak vế, pơtối rak hên tơmeăm khoăng ki kơnía túa lĕm tro ton nah hlối mơnhông ôm hyô tung kuăn pơlê, mơnhông tơdroăng rêh ối dêi kuăn pơlê. Rak tơniăn túa vêa vong ôh ti xê to veăng rak xiâm rêi  kuăn ngo mê ối mơhnhôk mơnhông cheăng kâ krá ton.

VOV.Xơ Đăng - Mâu hâi hdrối kố nah, hên cheăm bêng kơpong peăng mâ hâi Lâ kong pơlê Gia Lai lo lăm pêi cheăng pêi pro “Cheăng pêi thâ Quang Trung”, mơjiâng pro hngêi ối ăm kuăn pơlê kơpong ki hmâ tro kong mê khía mơhot têa kân lân lu, mơ-eăm pro klêi cheăng ki ‘mâi xĕn mâu rơpŏng kuăn pơlê lo ing kơpong tíu ối ki rơ-iêo hdrối vâ mot tung rơnó kong mê khía mơhot hơnăm kố.

VOV.Xơ Đăng - Lối chât hơnăm klêi kơ’nâi lo ing pro mố đô̆i, hên mâu mố đô̆i tro rong, mố đô̆i châi tamo a Dak Lak xuân ối kơhnâ lăm dêi a chiâk deăng kơphế, sầu riêng, tiu. Tơkâ luâ mâu tơdroăng ki tro rong, vâi ôh tá xê to mơjiâng cheăng kâ rơpŏng hngêi mê ối pleăng tơnêi pro troăng, hnê tối mâu tơdroăng ki rơkê plĕng tung pêi cheăng kâ, veăng gum mơjiâng thôn pơlê nếo ƀă kăn pơkuâ cheăm bêng. Mâu ngế lêng hơnăm ki mê nah dế pơtối pleăng dêi hnoăng tung tơdroăng cheăng ƀă mơjiâng pơlê cheăm.

VOV.Xơ Đăng - Khu hnê mơhno tơkŭm pêi pro ‘’Tơdroăng 500 hâi măng mơdêk tơdroăng ti tăng, tơkŭm chiâ rôu ƀă mơnhên inâi kơxêng kiâ mô đô̆i ‘’ kong pơlê Dak Lak tơkŭm po rôh hôp má môi, môi tuăn Pơkâ pêi cheăng, xing xoăng hnoăng cheăng mâu ngế pêi cheăng ƀă pơkâ pơkuâ a tung kong pơlê.

VOV.Xơ Đăng - Mâu Khu râ pơkuâ cheăng a cheăm Đăk Pek, kong pơlê Quảng Ngãi (Tơring Đăk Glei, kong pơlê Kon Tum ton) châ hlo, tơkŭm môi kơxêng kiâ mơngế hlâ ai hnoăng a kơpong thôn 16/5.

VOV.Xơ Đăng - Pêi pro “Cheăng pêi thâ 500 hâi măng”, mâu hâi hdrối kố nah, a Gia Lai, khu kŏng an tơrŭm ƀă kăn pơkuâ kong pơlê ƀă mâu tíu pêi cheăng ki ai tơdjâk tơbleăng pêi rôh ki lăm xo túa ADN mâu nhŏng o, rơpŏng hngêi mố đô̆i ki hlâ tung rôh tơplâ nah tá hâi ‘nâi inâi, khế hơnăm kot mâ. Rêm túa châ xo hâi kố ôh tá xê to tơdroăng ki kal vâ gum ăm cheăng séa ngăn, mê ối cho tơ’nôm môi tơdroăng tơngah vâ mâu rơpŏng ki tơkôm tung lối chât hơnăm ai rôh tăng hlo dêi nhŏng o rơpŏng hngêi tơná.

VOV.Xơ Đăng - Kong pơlê Quảng Ngãi dế thâ kêi đeăng tơmeăm khoăng, tơ’nôm khu thái cô ƀă mơdêk rĕng mơjiâng mâu tơmeăm hngêi trung hriâm, tơniăn mâu pơkâ lĕm má môi vâ hok tro mot hơnăm hriâm nếo.

VOV.Xơ Đăng - Kơvâ ngăn Hnê hriâm kong pơlê Dak Lak dế tơrŭm ƀă mâu cheăm bêng kong pơlê rah xo hok tro mot hriâm, pê klêi pơkâ tơkŭm po hnê hriâm ai tíu kâ koi pơtê, ƀă pơtê kơhâi dế a pái toăng hngêi trung péa râ kơpong tơkăng kong.