VOV.Bahnar - Tơdrong kơtơ̆ng ang năr ‘nâu, ‘năr 13/7/2026, đei 1,2 tơdrong kơtơ̆ng ang tơm tơ̆ hơla âu: - Tổng Bí thư, Kơdră Teh đak Tô Lâm vang truh pơm Lêh tơbăt 80 sơnăm Năr joăt joe khŭl lĭnh Vei lăng sơđơ̆ng kon pơlei. - Thủ tướng Lê Minh Hưng vang truh pơm lêh pôk pơ ư Khŭl bơ̆jang tơgŭm Venezuela hơmet pơ ‘lơ̆ng hiong răm đơ̆ng teh tơdrŏ. - Đắk Lắk tơbăt tơdrong jang hơtŏk tơiung lơ̆m chăl ‘nao. - Lâm Đồng - roi tơbăt krê hơmơt găh tơdrong truh glơ̆k kơ đak tơ̆ hơioh lơ̆m pơyan he.

VOV.Bahnar - Kơsô̆ 28 ‘nu hơioh lôch, rơka lơ̆m 6 khei blŭng sơnăm 2026 tơ̆ dêh char Lâm Đồng, lơ̆m noh lôch glơ̆k đei vă jê̆ truh 90%, jing tơdrong tôch ơh sơngon. Tơdrong krê hơmơt âu 1 ‘măng dơ̆ng athei hơtŏk đon kơchăng mă brĕ đơ̆ng rŏng kơ tơdrong lôch glơ̆k ‘nao đei tơ̆ xăh Nâm Nung, dêh char Lâm Đồng.

VOV.Bahnar - Anih pơgơ̆r jang "500 măng năr sir chă, pôi akŏm păng chih hơdăh hơnăn linh lôch tang ăn teh đak" xăh Diên Khánh, dêh char Khánh Hòa oei krao hơvơn đe linh so, bơngai ƀôh tom măt păng kon pơlei roi tơbăt dôm tơdrong găh đe linh lôch tang ăn teh đak lôch tơ̆ Hnam phak Thành Diên Khánh adrol kơ sơnăm 1975.

VOV.Bahnar - Tơdrong jang “chă tơteh plei sầu riêng” hơnhăk ăn iŏk yua dôm jĭt triê̆u hlak jên, ƀơ̆t lăp kơ hrĕng triê̆u hlak jên 1 khei gơnang đơ̆ng tơdrong hôh vao tôch hơiă. Mă lei, tơ̆ rŏng iŏk yua hơiă ‘noh jĭ tơdrong pơhrăm tôch kơ hơlen păng kơhret hrŭ ‘mong tôch kơtrăp tơdăh bơngai jang bơh kăt ƀơm hơvơ̆l plei ‘lơ̆p.

VOV.Bahnar - Ưh jăh gơ̆h pơma đa đei tơ̆ đe hơioh đơ̆ng 6 khei truh 3 sơnăm, roi đunh roi đei lơ, pơm ăn lơ mĕ ƀă pơngơ̆t. Ưh jăh gơ̆h pơma tơ̆ hơioh yoa lơ tơdrong, ƀât yoa đơ̆ng jĭ jăn lơ̆m jơhngâm đon păng anih arih xa. Yoa thoi noh, mĕ ƀă athei hơlen năng mă ‘lơ̆ng kiơ̆ khei ‘năr pơhrăm pơma vă gơ̆h băt hrôih păng hơmet tơtom, pơm ‘lơ̆ng ăn tơdrong tih vơ̆ tơ̆ đe hơioh.

VOV.Bahnar - Đơ̆ng dôm pơlei hlôi đei kơjăp lơ̆m lơ jơhnơr arih, lơ tơpôl kon pơlei oei xa tơ̆ Đắk Lắk ‘nao yak mât lơ̆m 1 tơdrong jang hơmet ming dơ̆ng. ‘Nâu ưh lăp tơdrong jang hơmet ming pơlei pơla, kueng kơphô̆ kiơ̆ nơ̆r athei kăt tơjur khul jang đĕch, mă oei jing ƀai toan pơm ‘lơ̆ng ăn tơdrong đei yoa hăm vei kơjăp anih jŏh ayŏ kơ dŏ xoang, tơdrong juăt đơ̆ng sơ̆ păng hơmet kơjăp tơdrong pơvei lơ̆m tơpôl. Tơ̆ phường Ea Kao, trong jang hơmet ming hlôi iŏk đei tơdrong tơgŭm kơtă tơ̆ tơring.

VOV.Bahnar – Hăm kon pơlei Bahnar, chĭng chêng păng hơri brông ưh kơsĭ jing tơdrong joh ayŏ pơdah đĕch ôh. 'Noh jing nơ̆r pơtruh hăm Yang hơpang, jĭ djoi tơlei kơhret tơdrong tơguăt tơguăl kon pơlei pơla. Hăm tơdrong hơrih 'nao hrei ou, đe sơnăm mơlôh tơ̆ xah Tơ Tung, dêh char Gia Lai, pơlei pơla Ƀok Núp nuih kơtang, tŏk bŏk oei hơdrin vei răk tơƀăk mong um ai joh ayŏ kon kông po kơdih.

VOV.Bahnar

VOV.Bahnar

VOV.Bahnar

VOV.Bahnar - Tơdrong tơroi kră sơ̆ “Dăm Giông hăm Bia Rang Măr” kơ hơdrung Bahnar tơroi găh dăm Giông nuih mơng pran kơtang, đei jơhngơm đon gơh găt, ưh kơ băt kơ hli yak trong bri kơdrơ̆ng, hơsơ̆ng hloh kông kơjung vă dŏng pơyô răm đơ̆ng yang kơnê̆ Akat rôp. Yak hloh ưh kơbăt dôm yơ tơdrong mơmat tat hli hlơt, tơdrong tơroi hôn bơnê jơhngơ̆m đon nuih mơng, pran kơtang păng lui, jơhngơ̆m đon ‘lơ̆ng kĕ jei jơhngơ̆m đon kơnê̆.

VOV.Bahnar - Pơyan pơdơ̆h he jĭ jơnăr đe hơioh pơdơ̆h ngôi đơ̆ng rŏng 1 sơnăm hŏk pơhrăm. Mă lei, lăp dôm khei âu ki, tơ̆ Tây Nguyên đĭ đei hlŏh 20 ‘măng glơ̆k kơ đak, bơngai răm ‘nŏh tơtă đe hơioh ngăl. Tơ̆ dôm tơring tơrang, tơring hơtăih yăih, ƀât bơngai ‘lŏ, bơngai kră hăt choh jang mir, đe ‘lơ ‘lơ̆p chă pơm ngôi kơdih, chông băl jur hum tơ̆ đak krong, tơ̆ dơnâu đak, đơ̆ng noh jing đei tơdrong lôch glơ̆k tôch kơ mơnat. Pơm tông hơtuch giĕng năr ‘nâu đei hơnăn: "Lê̆ ăn pơyan pơdoh he jing tơdrong ơh sơ ‘ngon" jĭ nơ̆t tơbăt găh tơdrong ‘nâu.