VOV.K'Ho- Jơnau tơngit mho do dơ̆ poan, ngai 26 - 08 – 2026, geh ală jơnau tơngit tờm tơnơ̆ do:

VOV.K’Ho - Di tơnkah 81 nam Ngai Sơntờm lơgar Cộng hòa xã hội chủ nghĩa Việt Nam, mho ngai 25 nhai 8, Đảng ƀộ ƀòn dờng Hải Phòng bơyai lơh jàu Sơlòng 80, 70 sơnam Đảng.

VOV.K'Ho- Mpồl Lơh kơnòl broă sùm Tỉnh ủy càr Dăk Lăk ring bal gùng dà broă lơh ai ngui Jơnau lơh nền tàm pơrjum dong kờl priă blơi sră kham sơm kòp ờ sa priă ai cau dờng sơnam ờ hềt geh sră in. Kờp dŭ, rơlao 83 rơbô 700 nă cau bơh 60 tus hờ đơm 75 sơnam gơwèt mpồl geh dong kờl, mờ priă tă rơlao 114 tơmàn đong pah nam bơh kes priă càr dê.

VOV.K’Ho- Mho òr (25/08), tàm càr Lâm Đồng, Anih tờm dong kờl bơto pơlam broă lơh sa suơn sre Dà lơgar, Ƀộ Broă lơh sa suơn sre mờ Tiah ơm kis lam lơh bơto pơlam tơnguh pràn jak ai mpồl dong kờl bơto pơlam broă lơh sa suơn sre in bè lơh gơlik phan lơngăp lơngai, màh sồ tiah tam, jòi git anih lơh gơlik mờ lơh jat jơnau sồr drà kă bro dê.

VOV.K’Ho- Mut tàm kàl mìu, bơta kòp mprơm gơlik mhàm Dengue tàm càr Dăk Lăk gam ngai sơlơ gơguh uă. Kờp bơh bồ nam tus tŭ do, gùt càr neh git gŏ rlau 4 rbô 200 nă cau gơbàn kòp mprơm gơlik mhàm, tàm hơ̆ geh 1 nă cau chơt. Pal sền ngac là kơnòm dềt geh khà uă ngan tàm khà ală cau gơbàn kòp pal mut tàm hìu sơnơm nàng sơm. Mùl màl ai gŏ, uă cau kòp lòt tus anih kham sơm kòp tŭ kòp neh tam gơl tus tơngai sơbơng roh tài sền ờ sơp, sơm is tàm hìu. Bơta do lơh gơguh tĕ jơnau pơhìn gơ lời wơl jơnau ờ niam kơn jơ̆ ngan, geh tŭ là pơhìn tus màng kis cau kòp dê.

VOV.K’Ho- Tềng đăp bơta kơn jơ̆ sră nggal ù tiah gơguh uă tàm tŭ mpồl cau lơh broă tàm kấp sàh gam ờ hoàn geh, càr Gia Lai neh jòi geh broă lơh bơsong mờ măi mok. Bơh ală sră nggal ngan, broă lơh lơh broă ờs mờng mờ mờng chài bơsong bơta geh ngan, kwang bàng Anih tờm Drơng broă sră pơ àr gơnoar atbồ dà lơgar mờ Cơldŭ lơh broă Dăn lơh sră ù tiah càr Gia Lai neh lơh bal, “pơlam tàp” ngui bồ tơngoh jak kòn bơnus lơh gơlik – AI ù tiah bơh uă nhai lài mờ tŭ ai ngui tàm 135 sàh, sơnah ƀòn. Gùng lòt lơh gơlik AI ù tiah bơh mìng is càr Gia Lai dê pà gŏ bơta rcang lài geh uă bơta jrô tàm lơh pràn ngui jak chài măi mok mờ tam gơl sồ, bơh hơ̆ bơsong geh cồng nha dùl tàm ală broă gơ jal ngan tàm càr dê.

VOV.K’Ho- Tàm sàh Nhơn Lý, càr Gia Lai sơnđờm mŭt lơh Dơ̆ lơh chờ Rơbô bơkào mờ tơngume "Rơbô bơkào rê hờ ƀòn dờng dà lềng".

VOV.K'Ho

VOV.K'Ho-

VOV.K'Ho

VOV.K'Ho-

VOV.K'Ho- Tàm lơgar Việt Nam, pah nam geh rlau 100 rơbô nă cau chơ̆t tài ală kòp geh gơrềng tus jràu. Ờ mìng bè hơ̆ lơm, tơl gŏ jràu geh chu kung ndrờm bal mờ broă dùl bơnah priă jền bơh hìu bơnhă dê gơtìp hoàc huơr ờ geh kwơ. Chu jràu jŏ ngai digơlan gơ gơs mờng kwèng ờ gơtùi sang tĕ. Ờ dồ ết cau gĭt chu jràu là gơ aniai mơya kung gam pơn jat tai chu, geh tŭ chu jràu tàm hìu bơnhă tơn, lơh cau ơm bal, is ồn là kơnòm dềt, kung gơtìp gơrềng tài bơh ñhŭ jràu dê sơl. Sang chu jràu ờ mìng dong sền gàr pràn kơl dang să jan lơm mờ gam tềm pềr priă jền mờ bơt bơtàu tiah ơm kis niam rlau ai hìu bơnhă in.